新聞類別
港聞
詳情#
【明報專訊】廣播處長鄧忍光被港台工會質疑佢有政治任務，有聲音要求佢下台，不過處長原來都有好多人撐！話說挺梁組織「愛港之聲」同「愛護香港力量」噚日合作發起撐鄧忍光行動，齊齊遊行上廣播道港台總部，仲寫咗封「鼓勵信」畀處長，可惜佢唔喺現場收信，無得第一時間領情。
話港台「明明官方喉舌」
愛港之聲先喺九龍塘港鐵站集合，高舉支持鄧忍光標語，又話要打倒港台工會，行到港台電視部，召集人高達斌大叫「好多反中亂港節目都喺呢度製作」。跟住佢哋走上電台部同愛港力會師，成百人企喺門口，由高達斌宣讀鼓勵信，港台派代表接信後，佢哋就繞廣播道行一圈。
高達斌話港台用公帑營運，係官方機構，明明就係官方喉舌，政府身為老闆，有乜理由唔為公司利益，日日畀下屬無理取鬧，又話工會變咗太上皇，指手畫腳凌駕處長。不過據Emily理解，公帑好似係來自香港市民，而香港電台約章亦話港台係公共廣播機構，無寫到係喉舌喎。愛港之聲其中廿幾人之後去旺角行人專用區「D100戶外論壇」踩場，雙方推撞場面混亂，最後要警員分隔，搞到個論壇要早15分鐘完。
陳淨心向領事投訴被「嘟」
愛港力發言人陳淨心都在場，佢話鄧忍光係港台總編輯，有權畀意見，唔算係干預，質疑工會抹黑鄧忍光，想將佢變成橡皮圖章。之前陳淨心上港台《議事論事》講咗句「關你叉事」，被「嘟」咗個「叉」字，佢話港台誤導市民，已去信好多政府部門投訴，仲包括全港領事。Emily聽到打咗個突，唔通佢哋都「勾結外國勢力」？
留言 (0)
