天文台望遠鏡假失蹤早返老家

【明報專訊】天文台長岑智明噚日同傳媒見面，佢話為紀念今年天文台開台130周年，會出版名為《有緣相聚》嘅文集，除咗重溫歷史，仲請歷代6位華人台長撰文，憶述任內經歷同體驗，結集成書，最快於本周六、日天文台總部開放日發售。書中有唔少珍貴圖片，其中一張係天文台喺19世紀末開台初期，顯示尖沙嘴總部旁有一幢圓形建築物，但無任何記載，結果由現任台長揭開謎底。


出文集賀開台130周年

台長話，個多月前向一名本港收藏家購得一張舊地圖，顯示天文台開台初期嘅佈局，包括圓形建築物位置，原來內有一支叫「equatorial」嘅天文望遠鏡，係第一代台長William Doberck博士喺英國借嚟嘅望遠鏡，用嚟觀星校對時間，好重要咁話。


天文台上下一直以為，呢支望遠鏡喺二戰時落入日軍手中，但台長追查下發現，望遠鏡早於1930年代已經歸還，現存於英國科學博物館，由於底部損毁需要維修，無法趕及今年內運來香港喺慶祝開台130周年嘅活動展出，真係有啲可惜。