CY：唔識養錦鯉

【明報專訊】上任特首曾蔭權（Donald）喺禮賓府養錦鯉，但人走茶涼，唔少市民關心特首梁振英（CY）入主禮賓府後，Donald所養嘅錦鯉嘅情况。CY噚日請記者到禮賓府茶敘，有記者問到Donald個錦鯉池仲喺唔喺度？CY即刻話「喺度」，但佢就坦言唔識養錦鯉。不過，問到會唔會物歸原主，CY就笑而不語，睇嚟無咁嘅打算。


鯉歸原主？ CY笑而不語

CY噚日主要喺禮賓府嘅ball room（宴會廳）招呼記者，講到禮賓府喺佢入主後有乜改變時，佢話上年打風ball room嘅漏水情况，搞到要擺水桶陣，因此禮賓府啱啱換晒屋頂嘅瓦片。但因為禮賓府係法定古蹟，所以要去佛山訂一模一樣嘅瓦片，仲要經古物諮詢委員會睇過，先可以重鋪瓦頂。早前有報道提及，禮賓府為咗做例行維修及度身訂做裝修工程，就用咗1485萬元。


佛山訂瓦片補屋漏

茶敘原本喺花園進行，但因為噚日落雨，移師室內。CY提到有喺禮賓府繼續種嘢，最近就種瓜。講到呢度，CY電話突然響起，原來係打錯，有記者笑笑口話，唔知係咪「西環」打嚟，所以CY先至唔聽喎。