羅湖女囚隨時為H7N9加班

【明報專訊】內地H7N9禽流感疫情令香港人好緊張，就連在囚人士都要提高戒備。一直有為政府人員做口罩、只收女犯人嘅羅湖懲教所話，已經同在囚者「預告」，如果疫症殺到，佢哋隨時要加班，連紅日都無得放假。


最多月製180萬口罩

羅湖共有70個在囚者做口罩，每日8個鐘，每月大約做100萬個。懲教署工業及職業訓練組監督林天祐話，如果開足火力，每月生產量最多可提高到180萬個。在囚者嘅製品唔會攞出街賣，只會交去政府物流服務署分畀衛生署、食環署同消防處等部門，而有份造口罩嘅在囚者，每星期只會收番象徵式20蚊至163蚊嘅「人工」。


因串謀欺詐、喺舊年8月被判入羅湖懲教所嘅阿玲（化名），被安排做口罩嘅Q.C.（品質檢定），做口罩好多時都要特別謹慎，口罩要睇清楚先可過關，同做人一樣，唔可以行差踏錯！大家唔好睇少呢班在囚者嘅手勢，佢哋嘅出品喺2005年攞到「Q嘜」認證，質素有保證！