建制論壇 嘉賓唔知題目

【明報專訊】近月愛港力、愛港之聲等支持政府嘅民間團體活躍於政改問題上，噚日就有一個名為「愛中港青年文化社團聯會」，喺政府總部外舉辦政制論壇，Emily都想去湊吓熱鬧，但現場記者多過觀眾，喺論壇開始時只得3個市民，後來愛港之聲核心拉隊到場，令在場市民增至約10人。就連嘉賓何世柱同何濼生都不約而同喺到場後問搞手，其實論壇係講乜東東，似乎主辦團體事前準備要做好啲喎！


專講勞工何世柱 唔知講佔中

何世柱發言時坦白咁話，唔知今日係講佔中，又話自己過去十幾年都係講勞工問題，「但無論點都好」，民主都同經濟等問題好有關，又話《基本法》都講要循序漸進達至普選，佢喺無準備下打天才波講足20分鐘。


何濼生就話中國需要民主同平權，但認為結束一黨專政對中國唔一定係好事，認同特首候選人唔應該聲言結束一黨專政，仲話特首需支持「一黨專政」，但講嘅係專心為政咁話。


泛民「神秘嘉賓」拒出席

大會聲稱出席嘉賓仲有「高氏宗親總會副會長」高山及兩個神秘嘉賓，但擔任論壇主持嘅中港青社聯副主席陳玉娥就話，高山返咗鄉下嚟唔到，至於神秘嘉賓，佢就話喺金鐘行去添馬嘅天橋上見到民主黨何俊仁，邀請對方出席，但何俊仁以開會為由拒絕；又試過請民主黨主席劉慧卿，以及佔領中環發起人戴耀廷，但兩人都以不同原因婉拒喎。