「路路夠發」車牌 26萬成交

【明報專訊】運輸署噚日喺會展舉行車牌拍賣，除咗傳統車牌，仲有啲無英文字頭嘅特別車牌，講明不可轉讓，吸引唔少車主到場競投。全日拍賣嘅280個冧把當中，最後售出241個，其中以「6698」競投氣氛最熱烈，或者同佢諧音「路路夠發」有關，最後以全日最高價嘅26萬元售出。排名第二嘅係「RR 88」，以20萬元賣出；至於「7887」同埋「HK 8008」，就分別以18.5萬同13.5萬元售出，排名第三同第四。


其他車牌普遍都唔使6位數字成交，最平嘅車牌1000元就有交易。呢日拍賣為政府帶嚟超過330萬元收入，扣除開支後，將會全數撥入政府獎券基金作慈善用途。