市民挑戰羅范﹕乜叫廣泛代表性？

【明報專訊】噚日港台節目《眾言堂》請咗民建聯主席譚耀宗 、民主黨何俊仁等4人討論政改問題，呢個節目由港台同港大民意研究計劃合作，現場亦有由港大民調隨機抽樣選出嘅約100名市民，同嘉賓直接交流，港大話出席市民嘅年齡、社會階層等係社會縮影，但呢班市民代表對普選特首嘅訴求就好鮮明，仲同行政會議成員羅范椒芬（Fanny）討論乜嘢叫廣泛代表性，搞到Fanny好無癮。


事緣Fanny喺節目上強調選委會有廣泛代表性，言論被挑戰，有人問到選委會中代表廣大市民嘅勞工界得60票，但漁農界亦有60票係咪公平；另一名市民更質疑羅范口中嘅廣泛代表性係代表中央定係港人。


面對咁多質疑，羅范只係話如果連提名委員會點組成都要重新討論，就會將幾十年前嘅問題抽番出嚟，又強調《基本法》附件一都將現有嘅選委會形容為廣泛代表性。羅范喺節目中不時被無咪在手嘅市民激動地反駁，節目完結後羅范唔接受傳媒訪問就離開。