張志剛「巨星身分」入教資會

【明報專訊】行會成員張志剛4月起獲政府委任做教育資助委員會委員，引起學界人心惶惶，擔心「梁粉」入侵干預學術自主。噚日教資會主席鄭維新見記者時就透露，張志剛上月已首次開會，仲話佢同其他教資會成員一樣「個個都係粒粒巨星」，叫大家睇嘢唔好咁政治化，要對教資會有信心喎。


鄭維新話，22個教資會成員都係以個人身分接受委任，佢哋都係對社會、學術界有一定成就嘅世界精英，例如牛津大學前校長Sir Colin Lucas、倫敦大學學院校長Malcolm Grant、哈佛大學教授William Kirby。佢仲話如果唔係香港嘅大學有一定國際水平，班委員都唔會肯一年3次、每年嚟香港開會一星期畀意見。


至於一國兩制研究中心總裁張志剛呢？鄭維新無正面評價，只係話張有一定經驗，自己作為主席，會負責提供平台畀所有成員充分發揮長處為香港服務，仲形容到成件事係香港嘅運數。