訴訟基金捐款人不滿 大班願回水

【明報專訊】鄭經翰（大班）同何國輝兩個前DBC數碼電台股東，早前搞籌款爭取復播同打官司爭話事權，籌到580.6萬元，其後兩人同DBC大股東黃楚標和解，收錢了事。之後有啲捐款人不滿，要求大班回水。大班佢哋都算有交帶，噚日喺報章登廣告，話如果當時有捐款收據或銀行過數紀錄，佢哋都願意「回水」；但如果熱心市民以現金捐錢，咁就對唔住，恕難回水了！


要有過數紀錄 錢剩會捐出

去年嘅DBC事件鬧哄哄，當時成立咗「支持鄭經翰何國輝訴訟基金」，籌咗580.6萬元。基金發起人林旭華話，訴訟費同當時喺政府總部集會嘅開支，大概使咗521.7萬元，即大約用剩59萬元。林旭華話，之前已經有捐款人話，唔滿意大班和解無討回DBC，已經要求回水，而基金已經退回約20萬元。換言之，基金實際上剩番約40萬元。


林旭華話，今次登廣告都係想交帶清楚，提醒捐款人，若果想回水，可以憑單據喺5月31日前提出。若要求回水嘅金額超過40萬元，差額由大班及何國輝承擔，但如果基金仍然有錢剩，就會由基金信託人李卓人同朱耀明牧師決定捐去做慈善用途。要求回水者可以呈交捐款過數證明，郵寄周啟邦律師事務所。