網民要求美國 「出兵解放香港」

【明報專訊】中央官員一向反對外國勢力干預香港事務，點知噚日Emily上網，發現有網民走去搵美國白宮請願網站，要求美國「出兵解放香港」同埋「出兵解放中國人民」，截至噚晚，分別吸引咗幾百同埋過千人簽名，若果喺6月6日前儲齊10萬個簽名，白宮就會回覆喎。


儲夠簽名白宮會回覆

提出「出兵解放香港」嘅人理由係乜？提出者話同《獨立宣言》一樣，跟住無再解釋，而「出兵解放中國人民」嘅人就無講點解。


其實，上兩個月已經有網民向英國政府網上聯署平台e-petition，要求英國外交及聯邦事務部介入，協助港人爭取民主嘅聯署，主要只係畀英國公民或者常住居民簽名。美國白宮呢個請願網站，只要13歲或以上人士，去白宮網站開個帳戶就可以簽名，即係連Emily都可以簽，要求仲低過英國聯署平台。