韓國考察鍾國斌：下次去朝鮮

【明報專訊】自由黨鍾國斌（Felix）早前同業界聯手，成立「服裝發展委員會」，話要將深水埗變成香港嘅「東大門」，話口未完，原來Felix已喺上星期去咗韓國考察。Felix話，去到嘅最深印象，喺見到當地有部分商場24小時營業，部分最快喺落單12小時後就交貨。佢仲計劃8月去朝鮮考察，實行南北韓都去晒！


今次Felix去韓國，去咗5日4夜，佢話雖然韓國起貨快，但香港主要做high fashion，比較注重質素，所以香港未必行到呢種模式。不過，此行見到原來Samsung都有做時裝，覺得好得意。


講到點解去朝鮮，Felix就話，當地薪水只係中國四分之一，而且好多都係skilled worker（熟手技工），所以好想去睇吓有乜機會。話說今次Felix喺韓國食過人參雞，有記者提佢唔好食埋支參，Felix就話初初都唔知道，笑笑口話唔怪得知搞到㷫烚烚喎。