罰企個半鐘 CY最怕

【明報專訊】特首梁振英（CY）今日將到立法會出席答問大會，佢好關注議員究竟會問佢乜，前晚同建制派食飯時，就特別問議員到時會關注乜嘢問題。不過，估唔到嘅係，梁振英最關注係1個半鐘頭嘅答問大會要企足全程，令佢覺得好累，希望改吓規矩，令佢唔使企足全程喎。


有份去食飯嘅建制派議員透露，梁振英好關注點解特首喺答問大會要企足全程，而唔係好似其他會議咁，需要佢答時至企起身，家要咁企法，對脊骨、身體都唔好。據講，席間有人話，港英時代港督彭定康去立法局都可以坐喺度，前面仲有張大枱；但到特首董建華上任後，就變成特首要全程站立。梁振英希望返去港英時代，令佢唔需要企咁耐，但議員就有保留。


問建制派關注乜嘢

雖然打晒招呼，但今日答問大會，CY都走唔甩要回應前廉政專員湯顯明事件。民建聯葉國謙話，佢哋打算問特首點樣捍衛番廉署形象以及奶粉問題。泛民包括民主黨同工黨，都希望追問政改，希望特首唔好hea住做，街工梁耀忠就想為工人爭取集體談判權。經民聯主席梁君彥話會問梁振英點睇人大委員長張德江會見經民聯時，提到香港經濟如似逆水行舟嘅講法。