Ann姐心情好番 會同曾主席齊賀牛一

【明報專訊】民建聯蔣麗芸（Ann）前日喺議會發言被黨友、立法會主席曾鈺成指離題，搞到佢大罵曾氏「蝦」佢，噚日佢喺立法會就好好心情，仲大爆背緊議事規則，皆因現時議會「唔係議政，只係玩議事規則」；佢仲話自己背嘢都幾叻，聲稱議事規則得41條，加上又唔會逐字背，相信好快搞掂。但Emily查過議事規則有成93條。


議員爆四處宣揚生日

阿Ann仲話，其實曾鈺成都唔係成日跟議事規則做裁決，仲戥新民主同盟范國威唔抵，話對方上星期喺答問大會上企喺度抗議，最終被趕走，但佢就話議事規則都無寫明唔准企。


阿Ann心情好相信亦同佢今日生日有關，佢噚日拎住個橙色手提包行嚟行去，係早幾日喺馬會用幾百蚊買畀自己嘅禮物，據稱黨友今日會同佢慶祝，主角仲包括聽日生日嘅曾鈺成，唔知最終會唔會變成「和頭酒」。點解黨友知道佢生日？有民建聯議員透露皆因阿Ann四處宣揚，咁黨友都要做番啲嘢嘅。


曾講過老公唔記得結婚周年嘅阿Ann話，唔知老公會唔會記得佢生日，但就憶述十幾年前老公為佢搞神秘party，搞到佢著住喺屋企先著嘅便服同成班朋友慶祝。