三代馬仔馬女 齊講新春願望

【明報專訊】明日就係大年初一，Emily先向讀者拜個早年，祝各位馬到功成、馬年行大運。政界入面都有唔少壯馬嫩馬，當中包括特首梁振英（CY），以及立法會議員何秀蘭、范國威同郭偉強等。過去一年大家喺唔少政策議題上都針鋒相對，新一年相信大家都會繼續老馬有火、嫩馬有力！古書形容馬有風骨，莊敬自強，具堅毅不屈嘅內涵，Emily亦希望大家來年一齊做隻出色嘅馬仔。


◆特首梁振英（今年60歲）

七百萬人是一家

屬馬嘅梁振英已經一馬當先離港休假，犯太歲嘅CY，係咪諗住行個大運趨吉避凶？不過佢臨走前都不忘透過Emily同大家拜年，祝大家龍馬精神、心想事成！佢仲話過年過節，最能夠體會「家」嘅感覺，「七百萬人是一家」。佢話只要香港這個大家庭齊心，就一定可以克服挑戰。


◆工黨何秀蘭（今年60歲）

攝磁石 睡得好

馬女何秀蘭（阿Cyd）話犯太歲無有怕，最緊要做多啲好事同盡責做事，仲話「唔使攝太歲，攝磁石就得」。佢話一直都有攝磁石墊喺枕頭底，晚晚都「極度好瞓」，推介大家試吓。


今年阿Cyd嘅新年願望多籮籮，佢話希望有普選無篩選，仲要大愛平權，最重要係打工仔人人有份好工開，大家安居樂業。


◆工聯會郭偉強（今年36歲）

希望成家立室

郭偉強話雖然有指屬馬會犯太歲，但只要做嘢心安理得就可以啦。佢話家中長輩都有提醒佢要小心啲，盡量避免去醫院或者參加白事，郭偉強話會做乖仔，聽長輩嘅提醒。佢祝大家工作順利，最緊要身邊人開開心心。至於新年願望，佢話最希望可以成家立室，Emily祝佢心想事成！


◆新民主同盟范國威（今年48歲）

普選馬到功成

范國威（Gary）話無攝太歲嘅習慣，仲話即使有血光之災，都只係「洗吓牙啫（流牙血以擋災也）」。佢祝大家龍馬精神，打工仔唔會做牛做馬；小朋友牛高馬大。最重要係政治百駒競走，佔中萬馬奔騰，普選馬到功成。