夏千福廣東話同港人拜年

【明報專訊】入鄉隨俗，繼英國駐港總領事吳若蘭後，美國駐港總領事夏千福亦用廣東話同大家拜個早年，美總領館噚日喺YouTube上載咗一條4分半鐘嘅賀年短片，搵咗馬嚟做主角應節，講名叫漢娜嘅馬希望去總領事館應徵，去咗唔同部門面試，最後一關當然係夏千福，夏千福喺短片中用筷子夾蘿蔔糕食，又大講廣東話，唔少網民睇完都大讚。


夏千福同馬見工時，一開始就講廣東話，雖然帶外國口音，但都算順暢，佢同隻馬講，「你知道，我好鍾意喺香港同澳門，大家傾偈，食本地食物，例如雞蛋仔……」，講講吓仲拎起筷子夾蘿蔔糕，又帶領總領館員工一齊拜年，祝大家「身體健康、馬年進步、恭喜發財」。夏千福被喻為中國通，但估唔到佢嘅廣東話咁好。