21歲海豹手術醫好白內障 海洋公園首例

【明報專訊】海洋公園「港海豹」得意可愛嘅形象深入民心，但原來佢哋同我哋一樣，年紀大咗都可能會有白內障。海洋公園噚日就同Emily講，最近成功幫港海豹Rose嘅右眼做咗白內障移除手術。今次係海洋公園第一次幫海洋哺乳類動物做白內障移除手術，手術後Rose睇嘢清楚番晒，仲活躍好動過以前。


查實Rose今年已經21歲，係海洋公園年紀最大嘅海豹。9年前，訓練員發現Rose唔係好睇到指示，開始靠聽覺辨別方向，間中重會同其他海豹碰撞。佢哋望佢對眼，有芝麻咁大嘅白點，發現原來佢有白內障。隨住Rose年紀愈來愈大，佢眼上嘅白點都愈來愈大，年幾前開始完全睇唔到嘢，對光都無晒反應。


年紀最大海豹 術後好動過以前

海洋公園見到Rose嘅情况，加上技術開始成熟，就決定要同佢做手術，希望幫Rose回復視力。手術出動4個獸醫加4個護士，首先喺Rose眼球開一個小切口，用超聲波乳化眼球晶狀體內渾濁嘅部分，然後吸走佢，最後由切口拎埋未能乳化嘅部分出嚟。Rose做完手術休養咗兩個月，就完全好番晒。


海洋公園獸醫總監馬伯樂仲話，公園仲有5隻海獅海豹有白內障問題，嚟緊應該都會安排佢哋做手術。至於重見光明嘅Rose，等展館裝修好，唔使一個月就可以同大家見面喇。