無睇過《大時代》 張華峯話要向丁蟹學習

【明報專訊】相信大部分市民，特別係股民，都知道邊個係「丁蟹」，聽到「丁蟹效應」，隨時個心離一離，驚股市會大跌，但競逐連任嘅金融服務界議員張華峯，就唔知邊個係丁蟹，話希望有機會睇多啲佢嘅新聞，學吓對方嘅經驗、專長。


話說港台早前舉行金融服務界選舉論壇，其中一個環節係主持人問及候選人「假如我是丁蟹」，要求候選人作答。張華峯就話，如果佢係丁蟹，就要了解佢嘅業務性質、工作範疇同專長，先可以引導佢發揮專業，為社會服務。佢又話希望對丁蟹有多啲認識，「我暫時對佢認識唔深，希望有機會睇多啲關於佢嘅新聞，喺佢度學到佢嘅經驗、專長」。


主持再問張華峯信唔信「丁蟹效應」，佢就話丁蟹效應有好有唔好，好嘅大家要學習，唔好嘅大家要改變。佢嘅對手詹劍崙之後回答同一條問題時直言，可能張華峯以為丁蟹係歷史人物，詹話如果佢係丁蟹，至少唔會推自己3個仔跳樓。另一候選人徐聯安就話丁蟹係大家都唔想聽到嘅名詞，如果佢係丁蟹，會覺得失敗乃成功之母云云。


其實丁蟹係無綫經典劇集《大時代》中由鄭少秋飾演嘅要角，其後一有秋官主演嘅電視劇播出，股市好似咁啱都會下跌，被人稱為丁蟹效應。


張華峯噚日喺facebook回應話自己知道咩係秋官效應，亦知有大行就此出過報告，但承認無睇過《大時代》，唔知角色叫丁蟹，所以論壇「只好發揮我驚人嘅想像力同臨場應變」。