【馮仁昭四圍超】阿叻黑面交戲狄龍拍思捷爆肚

【蘋果日報】李思捷、狄龍、蘇玉華、錢小豪同林敏驄等主演新片《一家大晒》，前晚喺九展舉行首映禮，陳百祥（阿叻）、許冠文、汪明荃、薛家燕、毛舜筠同麥明詩等撐場，思捷同阿蘇見咁多圈中朋友到場支持，佢哋都話好感動。
成日做下靶位
狄龍之前受訪鬧爆有導演拍拍吓戲，丟低工作去食燒鵝，思捷同阿蘇就讚狄龍係好好嘅合作夥伴，為人仲好有修養。思捷話：「狄龍大哥經常有好多金句，有時佢爆肚出嚟仲好過劇本對白，所以就索性用佢嘅版本。」阿蘇話：「其實私底下狄龍大哥好有幽默感，似個大細路，一啲都唔嚴肅，而且文學修養好，成日都出口成文。」
講到日前舉行嘅台慶頒獎禮，有指阿叻同主持之一陸永互寸，最後搞到陸永被照肺，阿叻話當時只係搞氣氛：「如果要坐定定照稿讀嘅使乜搵我哋，講真我都唔知道佢會講錯劇名，所以我咪接住講，陸永嘅反應好好，如果佢唔窒番我，就反而唔好啦。」但當時鏡頭見到阿叻黑面，佢就解釋係交戲：「呢啲係我要交戲，講真下靶我哋都成日做㗎啦！」
撰文：馮仁昭