麥記今派包 加派人手

【明報專訊】連鎖快餐店麥當勞今朝喺全港大派「免費早餐」，旗下約230間分店派發煙肉蛋漢堡，每間派1000個（共23萬個），喺朝早6至11點，餐廳會特別開一個櫃位派包，又會擺定指示牌，話畀食客知大約嘅排隊時間，每人限攞1個，派完即止。要派1000個包，員工肯定有大把嘢做，麥當勞將會加派人手。


警方話佢哋上星期二已經同麥當勞傾派包安排，呼籲市民聽從工作人員指示，耐心等候，有需要會派人維持秩序。煙肉蛋漢堡原價15蚊，如果大家攞完包想買杯嘢飲，咖啡就盛惠13.3元。近日唔少人喺網上呼籲，叫大家將呢份免費早餐留畀真正有需要嘅基層朋友同老人家，Emily都提醒讀者，免費派包都係希望與眾同樂，如果因為一個包搞到秩序大亂，就認真唔值得喇！