梁志祥議辦開到去坪洲

【明報專訊】立法會第一大黨民建聯嘅議員辦事處果然梗有一間喺左近，新界西出選嘅梁志祥話，下個月會走到去離島坪洲開議員辦事處。睇番統計處資料，坪洲同喜靈洲加埋都只係有約7000人住，但梁志祥就話坪洲人口雖然少，開議辦成本效益低少少，但既然有服務需求，都樂意去做，仲請咗一個職員喺嗰度幫手。


梁志祥喺元朗及天水圍已經有3個議辦，加埋坪洲就有4個，而佢喺梅窩仲有一個聯絡處，佢話新西地域大，好似大澳日前火災，佢都有入去睇吓居民有乜嘢要幫手。


梁志祥另一頂帽子係新界社團聯會會長，呢個會係親政府組織，佢哋日前開會員大會，梁志祥就二次創作特首梁振英（CY）嘅口號，將CY掛喺口邊嘅「穩中求變」，改為「穩中求進 進中求勝」為題發言。梁志祥話新社聯係較傳統嘅組織，所以唔會高調話點樣出位大搞，只會低調穩步做嘢。


盼新社聯服務遍新界

話雖如此，佢希望將來喺新界7個行政區都能夠有掛新社聯牌頭嘅服務處，而佢哋暫時只係元朗同西貢有服務處。要拓展業務，無財不行，所以佢哋都會學民建聯喺下月底搞籌款晚會，目標籌500萬經費。