青年喜訊：「工作假期」擴至法國

【明報專訊】後生仔喜訊——下個月又多一個地方可以去玩「工作假期」喇。法國外交部長洛朗•法比尤斯（Laurent Fabius）噚日喺特首梁振英見證下，喺禮賓府同勞工及福利局長張建宗簽署協議，設立雙邊工作假期計劃。根據協議，雙方每年各有200個名額，最多可以喺當地逗留1年，並且喺當地打工掙錢，新協議今年7月1日開始生效。


香港家搞緊「法國五月」文化推廣活動，而法國外交部長就順便嚟公布喜訊。申請人要介乎18至30歲，香港嘅申請者必須通常住喺香港，同持有有效嘅香港特區護照或英國國民（海外）護照，仲須持有離境交通票或足以購買離境交通票嘅款項，亦要買涵蓋整段逗留期間嘅醫療保健保險。參加嘅年青人逗留當地期間可以做嘢掙旅費。


須介乎18至30歲

其實法國係第8個同香港簽署雙邊工作假期計劃伙伴嘅地區。2001年起，香港已先後同新西蘭、澳洲、愛爾蘭、德國、日本、加拿大同韓國簽訂同樣計劃，至今有約3萬個來自香港同其他伙伴國家嘅青年參與計劃。政府話，新協議將會進一步加強香港同法國兩地悠久嘅雙邊關係。


有關簽證申請詳情，香港申請人可以瀏覽法國駐港澳總領事館嘅網址http://www.consulfrance-hongkong.org；法國申請人可打電話到入境處查詢。