佔中開fb 攻低頭族

【明報專訊】呢個時代，個個都做「低頭族」，最有效嘅宣傳都係要靠互聯網。「佔領中環」噚日正式推出官方facebook同YouTube專頁，上載過去一段時間有關佔中嘅訪問同其他資料，包括商討日流程圖、義工招募報名表同籌款方法等，大家仲可以重溫「佔中十子」當日嘅發言片段，喺facebook輸入「讓愛與和平佔領中環」就搵到有關專頁。


YouTube亦有相關片段

行政會議成員張志剛前日批評，用「佔中」爭民主有如持刀逼婚。「佔中」發起人陳健民噚日喺港台節目《中國點點點》反駁，「佔中」係唔應該有肢體衝突，認為張志剛講得太恐怖，佢話若果佔中真係一把刀，極其量只係一把守護香港核心價值嘅刀，「喺呢個情况有時係要硬少少」。


陳健民又重申，「佔中」只係負責蒐集民意、將市民對普選嘅訴求表達出嚟，所以唔會參與政改談判工作，認為應該交畀政黨做，但亦希望政黨今次傾咗個方案番嚟時，可以先畀市民透過電子投票系統表態，以免重蹈2010年政改風波嘅覆轍咁話。


回應「刀論」 陳健民：太恐怖

另外，對於港福堂吳宗文牧師日前話，教會應該按照教會紀律，將犯法、包括公民抗命嘅教徒開除，陳健民噚日喺網上慨嘆，香港人喺選舉前被分為一等同二等公民，但出嚟為呢個秩序辯護嘅竟然係教會，仲話最重要係上帝有冇開除教徒嘅「會籍」，反問教會算什麼喎。