方國珊電郵遇襲 「英國遇劫」

【明報專訊】Emily噚日凌晨檢查電郵時，發現西貢區議員方國珊（Christine）發個「緊急響應」電郵（圖），仲係用簡體字寫，聲稱佢英國利物浦旅遊期間被搶劫，唔見晒所有現金、信用卡同手機，話需要1850英鎊「支付帳單」，但又無講清楚點解要錢，呢電郵一睇就知唔慌係真。

Christine向Emily訴苦，話前日晏晝開始發現有人入侵佢個電郵帳戶，至今足足收到過百個香港同海外電話，又有唔少人發短訊問候，擔心佢人身安全，仲話肯出錢幫佢，但就唔知有無人「中招」。Christine話，佢係第一次帳戶被入侵，噚日朝早已經報警，仲落口供，相信警方會調查IP地址，睇邊度入侵。