科學園設計賽 頭獎30萬

【明報專訊】科學園家搞緊第三期發展計劃，第三期項目標榜推動綠色科技，佢哋公布搞一個名為「給香港一份GIFT」嘅設計概念比賽，為第三期重點標誌性建築物，提供可持續發展嘅概念。比賽獎金可觀，專業組冠軍獎金高達30萬元，而一般人都可參加嘅公開組，冠軍獎金都成7萬。勝出嘅作品，仲可能應用喺實際設計之中。


科學園話，由社會提供設計概念，為香港嘅下一代送上綠色大禮。佢哋仲話「GIFT」（禮物）好配合科學園品牌，因為代表綠色（green）、創新（innovation）、未來（future）同埋科技（technology）。


科學園公布比賽詳情，話要搞搞創新，搵人送份禮物畀Emily，禮物包上面掛住一隻USB手指，裏面載有比賽詳情資料。拆開包裝嘅綠色樹葉，入面原來係一盆小盆栽，話係想送上一份綠色心意喎。


呢個比賽6月21日截止，詳情可瀏覽www.gift.hkstp.org。