郭炳江想同孫仔睇騷

【明報專訊】新鴻基地產郭家一向都好低調，第二代郭氏三兄弟下嘅第三代，係近幾年至聽過吓個名，好少現身公眾場合，新地嘅第四代更收得好埋。新地二佬、公司主席兼董事總經理郭炳江近日見到一班小學生，就第一次喺公開場合提起佢個孫，話好想同個孫去藝術節咁話！


話說新地今年同香港藝術節合作，贊助「創藝童樂樂」計劃，搞咗一系列活動，畀細路仔體驗多元藝術文化。幾日前，郭炳江同香港藝術節協會主席夏佳理，帶咗近百細路去天際100香港觀景台搞啟動禮同首場藝術教育講座。睇住班小豆丁蹦蹦跳，郭炳江笑到見牙唔見眼，仲話細路仔享受藝術節嘅表演，令佢諗起自己個孫，打算帶埋個孫去睇騷，享受藝術樂趣。不過，郭家始終低調，究竟個孫今年幾歲、係仔定女就無再講咯。