黃錦星幫手拉布？

【明報專訊】立法會拉布不斷，不過，噚日朝早環境局長黃錦星就「幫手」拉布，因為佢遲到而令立法會短暫休會三四分鐘。事緣噚日喺審議財政預算案修正案，即拉布之前，有幾條政府法案要首讀、二讀，雖然都只係按程序做，但都要有關局長現身至得，其中包括處理《2013年產品環保責任（修訂）條例草案》嘅黃錦星。


擺烏龍遲到致休會

噚日朝早11點幾，立法會突然休會，人民力量黃毓民就話，唔使佢哋拉布、點人數，都已經令個會議暫停，成班議員只係坐咗15分鐘，就已經行出嚟小休。三四分鐘後，黃錦星急急腳咁行入會議廳。根據黃錦星嘅新聞秘書講，佢哋局內有啲誤會，以為噚日會議議程會有6條口頭質詢，之後至到法案首、二讀，原來噚日係冇口頭質詢時段，所以唔知咁早就開始要局長現身，令到會議延誤，真係唔好意思喎。