囝囝發燒 阿涂：燒完醒咗

【明報專訊】呢排天氣反常，唔少人都中招病咗，民主黨涂謹申亦不能倖免。佢話自己畀囝囝信之傳染，仲大爆囝囝喺3個月內燒咗3次，發燒發到「黐咗」，智力不跌反升，進步神速，嚇到佢呆咗咁話。


問醫生係咪「黐咗」

阿涂話，信之喺今年起，幾乎每月病一次，之前仲因發燒入院。不過，佢話信之唔單止冇「鈍」，反而仲醒咗，好似佢發燒前唔識玩嘅拼圖遊戲，發燒後竟以神速完成。阿涂見狀即刻問醫生，問佢個仔係咪「黐咗」，搞到醫生唔知好嬲定好笑。


阿涂又大呻年初因為信之病咗，被迫放棄已訂好嘅日本機票留港陪囝囝，佢事後發現原來旅行保險係會賠嘅。佢提醒大家唔好似佢咁，大安旨意打算喺機場臨上機前至買保險，否則隨時就血本無歸。