獲獎導演讓位碼頭工演講

【明報專訊】曾經拍過有關六四的短片《春夏之交》的獨立電影導演盧鎮業（小野），噚晚喺演藝學院出席藝術發展局嘅一年一度香港藝術發展獎，獲頒電影新秀獎，主禮嘉賓係特首梁振英。不過小野並無好似奧斯卡咁多謝N個人，反而特別「邀請」咗碼頭罷工工人「阿四」一齊上台，等阿四可以當住特首等觀眾面前講出罷工心聲。


「應畀更重要嘅人講嘢」

阿四係外判商永豐嘅員工，家等緊復工安排。噚晚Emily搵到小野回應，小野話藝術本身係反建制，所以打算博一鋪，靠今次獲提名獎項為工人發聲。小野話安排阿四上台要過五關斬六將，要先同後台工作人員講，阿四係佢一個好重要嘅人，希望可以一齊領獎；後來工作人員話唔畀，阿四唯有喺後台等。


當小野上台後，即當住觀眾話，「咁重要嘅場合，應該畀更重要嘅人講嘢。碼頭工人阿四家就喺後台，工作人員你哋唔好阻住佢出嚟啦」。


工人阿四：大家都被剝削

小野話，當時台下觀眾都叫「放人」，後台人員唯有畀阿四上台，阿四便發表感受，佢話罷工咗40日，勞工處做過啲乜嘢？直到家工人自己要同判頭傾，先知道團結就是力量。佢仲話，「台下有咁多知識人士，工人都可以同你哋咁近。全香港唔單止貨櫃碼頭工人被剝削，其實大家都係，希望工人可以團結起來。」


小野話阿四講得好啱，碼頭工友同藝文工作者，喺呢個壟斷性資本嘅秩序下，係命運一體，今次罷工係一個好好嘅展示，希望大家可以互相支持。