保釣會獲捐李小龍合約

【明報專訊】保釣行動委員會早前去美加籌款，想大修保釣船「啟豐二號」，獲得當地保釣人士兼收藏家陳燦培捐出李小龍1965年進軍荷李活嘅首份合約，噚日舉行交接儀式。陳燦培話，已經搵咗李小龍女兒Shannon Lee簽名作實，底價100萬，委員會聽日將資料放上網拍賣。


合約3頁紙 料係《青蜂俠》

陳燦培話，李小龍當年喺《精武門》戲中打爛中國人係「東亞病夫」嘅牌匾，令外國人唔敢再蝦中國人，所以要送李小龍合約畀保釣委員會拍賣。呢份合約有3頁碳紙，講明當時佢接拍電影或電視嘅片酬，雖無講戲名，但相信係《青蜂俠》。


保釣人士曾健成（阿牛）話，「啟豐二號」維修費評估後升到140萬，但只會抽取合約拍賣所得嘅80萬元作維修，其餘就靠美加籌得嘅25萬，多出嚟嘅錢捐畀「慰安婦」。陳燦培話，若拍賣價高過100萬，會捐部分畀夏威夷博物館搞中美二戰展覽。