廣藥王老吉減價 平2毫鬥加多寶

【明報專訊】廣藥同加多寶呢對「涼茶冤家」，為咗王老吉商標已經對簿公堂多時，雖然最後由廣藥奪得王老吉商標權，不過戰事並未因此休止，今日佢哋又要响法庭上見，爭奪王老吉嘅「紅罐包裝權」。事關原本以綠盒包裝涼茶嘅廣藥，贏得王老吉商標之後推出紅罐王老吉，同加多寶包裝非常接近，於是兩間公司又再起火頭，互相指摘對方侵犯包裝權喎。


到底呢場「包裝權」之爭誰勝誰負，大家仲要拭目以待，不過自從廣藥攞咗王老吉商標，就積極為佢哋嘅廣藥王老吉鋪路搶佔內地市場，家响愈來愈多城市嘅超級市場同士多都已經可以見到廣藥王老吉身影，當然响貨架隔籬一定係加多寶啦。


除咗擴大市場覆蓋率，廣藥另一市場策略就係打減價戰，小琴最近响深圳超市就見到廣藥王老吉做緊優惠，每罐只賣3.7元，比貨架隔籬嘅加多寶平咗兩毫子。而早兩個月在北京、上海同杭州等地多個城市，廣藥王老吉更加將售價由每罐3.9元減至3元以下。當時有人放消息話廣藥減價係因為銷量唔好要清存貨，不過公司好快就澄清話減價係促銷活動。