莊陳有鬧政府唔請失明EO

【明報專訊】曾被視為平機會主席人選之一嘅香港失明人協進會會長莊陳有，早前接受樹仁大學學生刊物《仁聞報》專訪，佢質疑平機會揀人標準，話平機會只重視行政經驗，個人對公義嘅信念同素質反是次要；又話現任主席周一嶽雖然一上任就撐爭取性傾向歧視立法，但覺得周醫生只係「一時時」、「好像積極了，但大家還是看行動」。


大讚林煥光掌平機會

莊陳有話，雖然周醫生處理平權問題經驗有啲不足，不過家下定論言之尚早，佢希望保持觀望態度。歷屆主席中，莊最欣賞同係政務官出身嘅林煥光同去咗做競爭事務委員會主席嘅胡紅玉，莊陳有仲形容林煥光係平機會嘅「異數」，樂意與社會溝通，採納民間機構立場。


莊陳有又認為平機會成日話要「保持中立」，但唔應該以此為由「拒絕傾聽弱勢社群的聲音」，對於每年大專畢業嘅失明人士有3至4個，但政府97年至今無招聘過一個失明嘅行政主任（EO），莊陳有攤開手，話「就算中大畢業生都只是做接線生！」仲話唔知係咪我哋對社會嘅要求愈來愈低喎！