鼠王芬關注九龍城鼠患

【明報專訊】經民聯立法會議員梁美芬靠「滅鼠」成名，佢曾經喺2008年同內地滅鼠專家喺油尖旺捉咗17隻老鼠。噚日梁美芬喺立法會大會上不負「鼠王芬」之名，特別關心食環署舊年開始舉行嘅滅鼠運動成效，佢話2010年同2011年嘅全港鼠患參考指數分別係1.5%同1.7％，但舊年滅鼠運動開始後，鼠患指數反而升至2.4%，質疑運動成效不彰。


梁美芬仲留意到鼠患嚴重嘅九龍城區，過去兩年分區指數曾經大幅回落，但舊年又再回升至全港第二高，所以好想知道原因喺邊。食物及衛生局長高永文就以書面回覆解釋，雖然2012年指數比之前兩年高，但仍比過去5年嘅平均指數（約4.1%）低，鼠患已經大致受控。高局長仲話，籌劃滅鼠行動時，會考慮唔同地區嘅情况，亦會加強巡查九龍城嘅後巷等。