東華慈善嘉年華開幕 120元揈一次「陀飛輪」

【明報專訊】之前因為機動遊戲未獲發牌、未能如期喺星期一開幕嘅東華慈善嘉年華，終於喺前啓德機場跑道正式開幕。由噚日起到星期日（27日），有20元嘅「開心家庭慈善體驗日」門票，遊客憑票可以喺入場當日免費試玩指定一款機動遊戲，噚日嘅免費遊戲係「超級紐約滑梯」，如果想玩其他機動遊戲，就要去增值亭充值。


嘉年華暫得6個機動遊戲，包括瑞士製造嘅「陀飛輪」。「陀飛輪」由3個大框組成，3個框同時旋轉，將坐喺入面嘅人揈嚟揈去，Emily見到都覺得好暈。呢個重點遊戲20蚊入場費係唔包嘅，揈一次盛惠120元。


機電署話收到主辦單位18部機動遊戲申請，其中11部已批出「設計批准」，當中6部完成安裝，搵咗獨立檢測員完成檢測，並已獲批使用及操作許可證。嘉年華噚日起一直到3月28日，下周一之後就要買180元嘅一般門票，門票包20元入場費、120元機動遊戲面值同40元嘅攤位遊戲面值。入場者要喺網上買飛同埋預約入場時間，否則唔確保可以入場。