鄭欽文年終賽功虧一簣！呢位中國球手決賽面

鄭欽文年終賽功虧一簣！呢位中國球手決賽面對美國小將嘉奧芙，鄭欽文第一盤先贏6:3，但第二盤俾對方三度打破發球局輸4:6，第三盤鄭欽文一度領先局數5:3，但都被嘉奧芙追成5:5要打決勝局，最終鄭欽文細分輸2:7，激戰超過三小時後只能屈居亞軍。

雖然鄭欽文未能奪冠，但首度參加WTA年終賽便以亞軍作結，同2013年前輩李娜睇齊，賽後鄭欽文指呢場係非常接近嘅比賽，輸波係因為自己某方面做得唔好同稍欠耐性，每次輸波都會作出反思，令自己未來做得更加好，年僅22歲嘅鄭欽文，世界排名將會升上第五位。

至於比鄭欽文還年輕兩歲、首度奪冠嘅美國球手嘉奧芙，賽後指自己只係保持韌力，為咗每一分而戰，並為自己嘅表現感到驕傲，並感謝自己背後嘅團隊。嘉奧芙除咗贏得480萬美元冠軍獎金，仲以年僅20歲之齡就集齊WTA250、500、1000、大滿貫同年終賽冠軍，年終世界排名亦連續兩年排第三位。