2020年7月29日實施禁止堂食令首日

2020年7月29日實施禁止堂食令首日

小市民的心聲。

[30/7 09:17] 我做地盤。
今日晏晝放飯，我買咗碗牛腩河加啤酒。
　
「阿哥，無咗堂食喎。」粉麵店阿姐話。
　
「得喇！阿叔我單手拎住嚟食！男人老狗，我唔驚熱既！」我。
　
阿姐冷笑咗一聲。
當我行出麵店，打算去附近公園坐低慢慢嘆。
　
我心諗，你班香港人真係唔捱得，外國人都係咁樣野餐啦！
　
點知…公園被紅膠帶封晒，唔講以為入面有命案發生。
　
算數！我行過去人少少嘅路邊食！
　
正當我打開個河粉，諗起一個問題。
　
戶外口罩令，我一除低咗，咪犯法囉？！
　
唔緊要！我去商場啲後樓梯食！
　
好多廚房佬，晏晝落場都去嗰啲地方訓覺，仲有冷氣！不知幾爽！
　
點知，我一打開商場後門，見到已經有兩條友喺度食緊飯。
　
「室內限聚令兩人啊，過主啦！」其中一個話。
　
於是，我行晒成個區所有屋苑、商場…全部後樓梯都被人霸晒。
　
最後，我只好入去商場廁所，每格都有兩個人食緊飯！
　
我想食個飯啫，點解要咁對我喎？！
　
「你唔介意嘅入去食囉。」清潔廁所嘅阿叔，打開廁所放雜物嗰格畀我入去食飯。
　
我入到去，搬開啲雜物，坐咗喺廁所板。
突然間，一陣臭味傳過嚟，隔籬廁格條友，食完飯即刻屙！
　
算數，我真係好肚餓…
我打開碗牛腩河，啲河粉脹晒！筷子夾極都夾唔起！
　
我飲咗一啖已經唔凍嘅啤酒，好苦，好澀
好似我人生一樣咁苦澀。
幾十歲人，我有咩苦未捱過？
我淨係唔想犯法，同埋食碗牛腩河啫…點解都咁囉啊？
　
嗰一刻，我忍唔住喊咗出嚟。
我唔敢抹眼淚，因為我啱啱先醒起，我唔記得洗手。

慨歎: 昔日魚翅撈飯，今天如廁開飯。不知日間何世！艱苦的日子何時告終。