台資富邦 搵「本地薑」掌舵

【明報專訊】過去大半年，本港多家銀行「揸fit人」可謂更迭頻頻，繼去年9月匯豐香港後，至近日恒生（0011）換上李慧敏接替梁高美懿出任女大班，就連去年剛剛完成私有化嘅富邦香港，噚日都宣布人事變動，搵嚟現年62歲、本已退休嘅原中銀香港（2388）財務總監李永鴻（圖）出山，「空降」擔任該行董事總經理兼行政總裁一職，即日生效。


今次富邦都可以話係打破傳統，皆因李永鴻之前嘅歷任CEO職務，都係由台灣過江龍出任，好似前任董事總經理兼行政總裁梁培華，以及再之前嘅李晉頤咁。今次富邦香港邀請「本地薑」加盟，令其進一步將大中華業務做大做強嘅意向更為明顯。


富邦就表示，李永鴻除咗上述職務外，亦會兼任控股公司富邦金控資深顧問及經營委員會成員，藉以參與發展及執行富邦金控集團之大中華業務策略。至於上任不足3年嘅梁培華，就會繼續留任做富邦嘅資深顧問直至5月底。