老虎亞洲諗緊退錢

【明報專訊】證監會新任CEO歐達禮上場之後，一直被指作風強硬，睇佢又拎番保薦人怕怕嘅刑責條例出嚟諮詢，便可以略知一二。估唔到佢上場無耐，連好難打嘅老虎都要認輸！講緊嘅係由老虎基金培養出嚟，一班「老虎仔」創辦嘅亞洲老虎Tiger Asia基金。證監會由2009年開始，已經一直就建行（0939）配股嘅內幕交易，申請凍結佢哋近3000萬資產。不過班老虎仔就一直上訴，到家都只係排緊期上終審法院。


不過唔知係咪新CEO腳頭好，有消息話Tiger Asia嘅創辦人Bill Hwang出信畀所有客戶，話將會喺呢個月之內退還管理資金，因為法律程序好漫長喎。Bill仲話，有啲分析員將會離開公司自立門戶。咁講法，會唔會係因為老虎仔已經打定輸數，所以先一步回水呢？