陶君行宣傳片

【明報專訊】循九龍東出選立法會嘅社民連陶君行，推出一分鐘宣傳片，主題係「香港堅持，我們才有希望」，有阿陶多年嚟嘅抗爭片段，包括喺追究李旺陽死因遊行中被噴胡椒噴霧嘅情形。阿陶話，呢段片係新晉導演盧鎮業（小野）幫佢拍嘅，小野本身係社民連成員，曾喺香港電台劇集《女人多自在》客串，飾演「表弟」一角！唔少網民睇完都話覺得段片有啲「台灣feel」，阿陶話，原來佢哋問過華人民主書院、來自台灣朋友嘅意見。


九西候選人梁美芬之前亦推出題為「快樂西九，票投8號梁美芬」嘅MV，不過就同人唔同命，批評居多。梁博士喺首歌度話自己係「街坊大狀」，又話專業背景可照顧中產同基層需要；但有網民就形容首歌係洗腦歌，仲叫梁博士唔好「懲罰選民」，Emily噚日搵唔到梁博士回應。


梁美芬MV 彈多過讚

九東候選人仲有黃國健、陳鑑林、謝偉俊、胡志偉、黃洋達、梁家傑、譚香文同嚴鳳至；九西候選人有毛孟靜、黃碧雲、蔣麗芸、黃毓民、譚國僑、黃以謙、黃逸旭同林依麗。