侯志強：拍手當投票

【明報專訊】今屆立選最多名單參選嘅新界東，上水鄉事委員會主席侯志強早已表明支持自由黨榮譽主席田北俊，噚日田少去上水鄉委會拉票，但田少疑冇做足功課，有村代表問佢點睇古洞北發展問題，田少就連諮詢期都唔清楚，話自己近排比較忙，會盡快了解吓件事，搞到部分村代表不滿，質問田少連民生都唔關心，點幫新東村民呀。


掌聲即「通過」叫唔好阿吱阿咗

侯志強聽到之後急急幫口解釋，話每一條村啲瑣碎事，就算鄉委會入面都未必知得晒，對於佢哋對支持田少有保留，侯志強有啲發晦氣話，「到時投票冇人用機關槍指住你投」。


之後，侯志強話要用「掌聲」表決，代表「一致通過」支持田少出選，大家聽話拍手，但幾個村代表不滿呢個做法，話點都要投個票先，即時「辣㷫」侯志強，侯志強開口叫佢哋唔好喺度「阿吱阿咗」，最後投票結果勉強叫做「大比數通過」。


第二場新東另一候選人、民建聯陳克勤嚟拉票，侯志強都未㷫完，叫大家唔好針對雞毛蒜皮小事「丟大家架」，陳克勤話雖然知道大家已經「心有所屬」，但明言自己選情告急，期望上水鄉委會可以分少少票畀佢咁話。


新東候選人仲有湯家驊、梁國雄、劉慧卿、張超雄、黃成智、葉偉明、葛珮帆、龐愛蘭、方國珊、陳志全、范國威、龐一鳴、蔡耀昌、邱榮光、陳國強、何民傑同梁安琪名單。