白姐姐電話宣傳惹人嫌

【明報專訊】參選立法會超級議席嘅白韻琹以宣傳電話拉票，不過，有市民向Emily投訴，話從未向白姐姐提供個人資料，但依然收到自稱白姐姐競選團隊嘅電話，質疑白姐姐濫用個人資料咁話。白姐姐承認請咗call centre拉票，但就話從無將電話號碼畀嗰間公司。


白：從無畀電話號碼call centre

Emily早前亦收到白姐姐團隊電話，對方聲稱係按「阿拉伯數字順序打下去」，但Emily同事隨即收到另一通白姐姐團隊電話，令人質疑「順序」之說。白姐姐話，電話宣傳較環保，加上派單張嘅人不多，所以先決定電話宣傳，每個電話要花9毫半，暫時使咗幾萬蚊。


白姐姐同Emily講，呢個call centre係專欄作家周顯介紹，但就話已唔記得咗間公司叫咩名。Emily噚日打畀周顯，佢話要問吓間公司是否介意，先至可以答喎。參選超級議席嘅仲有劉江華、李慧琼、何俊仁、涂謹申、馮檢基、陳婉嫻。