林依麗叫對手「黐線科醫生」

【明報專訊】有「奇女子」之稱嘅立法會九龍西候選人林依麗噚日出席無綫電視選舉論壇時又有出位作，佢叫本身係精神科醫生嘅對手黃以謙做「黐線科醫生」，事後黃醫生一肚氣，批評林小姐咁講係歧視精神科病人，要求佢道歉，仲隨即向平機會、通訊局同選管會「三料」投訴。不過林小姐堅拒say sorry，更理直氣壯咁話﹕「道咩歉啫？家佢唔係咩？」


黃以謙投訴歧視病人

Emily睇番論壇片段，涉事二人喺辯論環節唔算有好大火花，林小姐喺黃醫生總結發言後突然語出驚人，由於當時黃醫生已經用盡發言時間，無機會即時反駁，但事後發聲明「還擊」。


做咗逾20年精神科嘅黃醫生話，「完全唔介意」林小姐稱呼佢做「黐線科醫生」，但就覺得「黐線」係負面標籤，對病人唔公道，佢一定要出聲咁話。


嫌毛孟靜絲巾有味

林小姐回覆Emily，否認自己歧視精神病人，「我係尊稱佢（黃以謙），佢咪投訴囉」。


講開林小姐，佢喺論壇期間講起內地民運人士李旺陽離奇死亡一事，仲想扮吊頸，但就話無帶絲巾，對手毛孟靜就好心借條畀佢用，點知林小姐竟然話絲巾有異味，毛孟靜畀佢激死！九西候選名單仲有梁美芬、黃碧雲、蔣麗芸、譚國僑、黃逸旭同黃毓民。