黃洋達官司找數羅生門

【明報專訊】人民力量九龍東候選人黃洋達（皇上）獲對手謝偉俊（Paul）嘅律師樓協助打官司一事，大律師條數係幾多、邊個畀，有不同版本，正當Emily搵各方人馬求證之際，「教主」黃毓民上周四晚喺網台公開件事，佢拍心口話自己無借錢畀皇上，但同人網蕭若元嘅說法有唔同。


蕭﹕毓民「私底下」代付8萬

Paul最近爆料，指其律師樓曾為因衝擊遞補機制公眾論壇、被判入獄3個禮拜嘅皇上，提供法律協助，只收番車馬、文件影印費等2000幾蚊，令皇上慳咗唔少律師費。


不過，蕭生同Emily話，皇上經謝偉俊律師樓轉聘大律師，大律師費需要8萬蚊，呢筆錢由毓民「私底下」代皇上畀，與人民力量無關。


毓民﹕無借過錢畀皇上

但毓民回應Emily時，斬釘截鐵話「無借過錢畀皇上」，至於有無幫皇上「包底」，毓民就話係「內部嘢」，唔需要答。佢其後喺網台重申，皇上「有找咗大律師嘅費用」，但就以「牽涉律師秘密」為由，唔肯講涉及幾多錢。


皇上﹕自己畀錢打官司之嘛

皇上就答得有啲亂：「大律師費梗有找啦……唔係，即係律師費當然有找啦，梗係有律師費啦。」Emily問皇上，毓民係咪畀咗錢佢打官司，未問完佢已搶住答：「呢個唔使交代啦，自己畀錢打官司之嘛。……無去收毓民錢，OK？」到底件事係點？當事人先知喇。


九西候選名單仲有梁美芬、黃碧雲、毛孟靜、蔣麗芸、黃以謙、譚國僑、黃逸旭同林依麗。


九東候選名單仲有胡志偉、黃國健、陳鑑林、梁家傑、譚香文、陶君行、嚴鳳至。


港島候選名單仲有單仲偕、許清安、葉劉淑儀、劉健儀、勞永樂、鍾樹根、吳榮春、陳家洛、王國興、曾鈺成、何秀蘭、何家泰同吳文遠。