陳太20蚊買兩底衫

【明報專訊】公民黨近排幾乎每日都有選舉活動，好似噚日，出選九龍西嘅毛孟靜（Miss Mo），請咗前政務司長陳方安生同佢一齊落區拉票，去到花園街排檔撐本土文化。陳太仲陪Miss Mo去同排檔東主打招呼，佢行去一檔買底衫嘅排檔，仲幫襯買咗兩件。
撐毛孟靜 花園街助拉票
烈日當空下去到花園街，陳太呼籲市民要支持有承擔、敢於向政府說不嘅候選人，陳太仲同Miss Mo行入花園街，去頭幾檔同店主打招呼。除咗打招呼，佢似乎對花園街舖頭嘅貨物好有興趣，行到去一檔買底衫嘅排檔，佢原本喺度呼籲檔主支持Miss Mo，轉眼間就當場揀底衫買，陳太話買嚟做運動時著，最後用20蚊買兩件短袖底衫，檔主仲一度想送畀陳太，但陳太就婉拒。
九龍西候選名單仲有黃以謙、黃碧雲、譚國僑、黃逸旭、蔣麗芸、黃毓民、梁美芬同林依麗。