金融界辯論獨沽一味

【明報專訊】立法會金融服務界有5名候選人，係競爭最激烈嘅功能界別，但奇怪嘅係選舉氣氛淡如水，其中原因可能係兩名熱門候選人「放飛機」或扮忙，唔肯出席大大小小嘅選舉論壇，相信唯一可能齊人辯論嘅一次，會係下周五（31號）由證券業界舉辦嘅論壇。但大會就先旨聲明，只准台下提問金融業問題，想針對對手或者批評國家，統統不准。呢個論壇預咗無火花，唔怪得各人都出席。


電台想搵李君豪訪問食檸檬

詹培忠唔再玩，即有5人出嚟爭議席，包括被人叫做「梁粉」嘅李君豪、做咗40幾年證券行嘅張華峯、有外匯教父稱號嘅鄧予立、工會背景嘅林德明，同埋泛民背景嘅甄文星，其中李、張更被視為大熱門。今次選舉有得爭，多個傳媒機構都想搞選舉論壇，但Emily就收到風，因為熱門兩位大哥話事忙唔肯參加，所以《明報》同Now TV都搞唔成；有電台仲慘，想搵李君豪做電話訪問都食檸檬。


不過，31號晚由業界9大商會及協會搞嘅論壇，5人都好難話唔去。搞論壇嘅籌委會約法三章，表明論壇中嘅提問唔准針對對手個人或者政黨，更唔准攻擊國家；大會只准台下提問者寫低問題，由主持人抽出問題同篩選，保證只問有關業界嘅問題，什麼政制、普選或者人權，對唔住，統統會篩走。


甄文星：唔敢面對群眾點立足

林德明話願意出席論壇，亦唔介意回答政治民生等問題，反正做到議員，都要處理社會各項議題。甄文星就話，可能有其他候選人唔鍾意有火花，所以論壇有咁多規限，佢話如果候選人唔敢面對群眾，將來點喺立法會立足，唔通將來只處理金融業事務，講到其他事項就學人哋「三點不露」咩。