何君堯想獲發叔支持

【明報專訊】參選立會新界西嘅屯門鄉事委員會主席何君堯（Junius）噚日落村拜會，想攞多啲鄉事票。Junius民調暫時落後，佢話希望鄉議局主席劉皇發以個人甚至鄉議局名義支持佢出選。不過，Emily記得佢今年反對發叔做屯門區議會主席，唔怪得知Junius引述發叔只係話「盡量去做」，無一口答應。


發叔：盡量去做

Junius同Emily講，前個星期五拜會發叔，祝賀佢自動當選立法會鄉議局功能界別。佢話一直有同發叔聯絡，又引述人哋話鄉議局應該有「綜合聲音」，為新界人共同利益，所以就同發叔反映，希望有佢同鄉議局支持。


另外，身為律師會前會長嘅Junius，噚日同屯門大欖涌村村民商討，計劃今日入稟高院提出司法覆核。事緣天文台計劃喺條村幾百米嘅山上起風切變雷達站，村民就話擔心輻射同影響風水喎。


新界西仲有梁志祥、郭家麒、陳恒鑌、譚耀宗、麥美娟、麥業成、田北辰、梁耀忠、李永達、陳樹英、陳強、陳偉業、李卓人、陳一華同曾健成名單。