稱剛上台 胡應湘呵住新班子

【明報專訊】合和成立咗40年，噚日喺九龍灣展貿舉行慶祝儀式，請咗特首梁振英（CY）做主禮嘉賓，主席胡應湘（圖）事後同一班傳媒朋友敘舊，就話對過去兩屆特區政府好失望，一直唔肯推地，搞到家樓價飛升，年輕人望「樓」興嘆。問佢老人家CY係咪應該快啲推地，佢又話要謀定後動，「一步一步咁增加，總之要諗點解決樓價高問題」。


對前兩屆政府失望

胡應湘一向敢言，但對新政府佢愛護有加。「只係上咗台51日定係52日，一直冇機會畀佢哋做嘢，我唔會批評佢哋。」但對上兩屆政府，特別係曾特首，佢就一啲都唔客氣，「曾蔭權嗰幾年，推政策只係諗點樣過立法會」。


大家都知道胡應湘係讀土木工程出身，鍾意大興土木起基建，佢最唔同意香港搵唔到地皮。「香港只係用咗20％的土地，何來冇地問題。」認為最大問題係規劃部門阻住晒。


佢又話，「香港咁嘅制度真係唔得，90幾個percent嘅人將錢畀晒幾個percent嘅人，政府一定要起多啲平價樓。」如果唔係，年輕人上唔到樓，遲早出事咁話。