推「棋盤」遊戲諷泛民 民建聯自認搞蛇齋餅糉？

【明報專訊】今年立法會選舉七國咁亂，唔單止多咗個超級區議會議席，唔少政黨更喺同一地區分拆多張名單參選，如果唔做好配票工作，隨時一張名單扯走晒所有票，令其餘黨友墮馬。民建聯近日推出「投票指南」派街坊，教晒全港各區選民手上嘅兩票，應該分別投畀邊個民建聯成員，但選民會唔會咁聽話就唔知喇。


搶咪拉布要退後幾格

除此以外，民建聯製作咗一個名為「團結創新天」嘅棋盤遊戲，但睇真啲，差唔多成個棋盤都係針對泛民，似係用嚟喺選舉攻擊對手多啲。例如「在議會搶咪、掟嘢、掃枱、叫罵」、「玩拉布、搞流會、浪費公帑兼辭職」都要退後幾格，明顯係衝着社民連同人民力量而來；「一邊反對政府重組架構、一邊靜靜雞去申請做政治助理」、「別人申報就窮追猛打，自己友漏報利益就變鵪鶉」就擺明針對民主黨，佢哋仲將民主黨嘅白鴿黨徽，惡搞成一隻好肥嘅鵪鶉