譚國僑唔排除「告急」

【明報專訊】立法會選舉投票日逐漸逼近，多個民調顯示，喺九龍西接棒嘅民協譚國僑支持度依然麻麻，譚國僑噚日同傳媒茶敘時話，佢嘅支持者好緊張佢能否保住民協20年老巢，唔排除遲啲要打「告急牌」咁話。


馮檢基上屆得票難全部過戶

譚國僑坦言，馮檢基上屆近3.5萬得票，無可能百分百過戶畀佢，加上今屆參選名單少咗，預計要2.5萬至3萬票先能穩奪一席，佢應該唔可以好似上屆梁美芬咁拎住1.9萬票入議會。


不過，譚國僑相信民協能夠吸納今屆無參選嘅劉千石上屆逾萬得票，因為佢哋都係服務勞工同基層為主，又係溫和民主派。另外，民協喺九西有21個椿腳，包括11名現任區議員同10人曾經出選區議會，都唔係完全無優勢咁話。


九西候選人仲有毛孟靜、林依麗、黃毓民、蔣麗芸、黃以謙、黃逸旭同黃碧雲。