周一嶽：教國教「不說教」

【明報專訊】前食物及衞生局長周一嶽噚日上電台時講到，退休後會學唱歌同打壁球。對於國民教育科，周醫生話自己自小全家都有愛國思想，認為認識多啲祖國嘅文化民情係應該，但就未必要用說教式教育，反而應該客觀咁幫助小朋友分辨是非、諗吓可以點樣將個課程搞好啲。


退休 「忘不了」學聲樂

走出熱廚房兩個幾月，周醫生退休生活寫意，有大把時間做自己鍾意做嘅事，例如唱歌同打壁球。之前一首《忘不了你》廣為傳頌，周醫生話自己學緊聲樂，主持笑住問佢「你仲要學？」周醫生話音樂係「學無止境」，會專注改善自己聲調同換氣方法。


不評論李旺陽報告應否交聯國

講到新政府嘅施政同醜聞，周醫生話要畀多啲空間新政府工作，今年有立法會選舉，所以升溫係好正常，加上部分議題涉及有爭議嘅操守問題，自然會被傳媒聚焦。佢又講到，覺得之前對李旺陽事件嘅分析係正確，死因的確有好多疑點，但唔評論份報告應唔應該交畀聯合國委員會。


將帶運動員參加倫敦殘奧

周一嶽唔再管食衛，家走去做香港殘疾人奧委會同傷殘人士體育協會會長，遲啲會帶運動員去倫敦參加殘奧會，預期成績會好過上屆嘅5金3銀3銅，其中田徑代表蘇樺偉、劍擊代表余翠怡狀態都好好。