人力叫觀眾「多謝杜小姐」

【明報專訊】被揶揄係「宇宙唯一民主派」嘅人民力量，早前被本報揭發獲新界社團聯會名譽會長杜玉鳳贊助廣告費後，引起軒然大波，唔少網民更諷刺該黨其實係「人民幣力量」至啱。近日網上流傳一條片段，證實原來杜玉鳳唔止贊助人力近80萬嘅紅隧巨型廣告，更另外贊助7.5萬現金畀佢哋做選舉經費，睇嚟杜玉鳳真係深受人民力量嘅理念感動喎！


贊助80萬紅隧廣告

身兼天行集團創辦人嘅杜玉鳳，親建制背景濃厚，除咗支持人民力量外，亦被揭同樣贊助公民力量嘅龐愛蘭賣廣告。人民力量早前話，杜玉鳳係出席咗香港人網台慶，被袁彌明嘅發言所感動，先決定捐廣告。


噚日網上流傳當日台慶嘅短片，人力成員親口宣布，杜玉鳳仲另外捐咗7.5萬畀佢哋做選舉經費，佢哋更要求在場觀眾起身感謝杜玉鳳，高呼「多謝杜小姐」。


參選新東嘅除咗龐愛蘭同袁彌明名單，仲有湯家驊、梁國雄、陳克勤、田北俊、劉慧卿、張超雄、葛珮帆、黃成智、葉偉明、方國珊、范國威、龐一鳴、蔡耀昌、邱榮光、陳國強、何民傑、梁安琪。